Türkiyənin Manisa vilayətinin Soma qəsəbəsində kömür mədənində baş vermiş faciədə dünyasını dəyişənlərin sayı 298 nəfərə çatıb. Rəqəmi açıqlayan Türkiyənin enerji və təbii sərvətlər naziri Taner Yıldız xilasedicilərin daha 8 işçinin meyitini torpaq altından çıxardıqlarını deyib: "Hazırda intensiv şəkildə xilasetmə işləri davam edir. Hesab edirəm ki, gün ərzində mədəndə qalan digər işçiləri də xilas edə biləcəyik".

Nazir həmçinin mədəndə 100-dən çox işçinin qalması ilə bağlı yayılan məlumatları təkzib edib: “Hadisə baş verən zaman mədəndə 787 işçi olub. Onların 485 nəfəri xilas edilib. Bu günə qədər 298 nəfərin cəsədi çıxarılıb. Odur ki, biz hazırda mədəndə qalan 17-18 nəfərin həyatını xilas etmək istiqamətində iş aparırıq".