Yasamal Rayon Məhkəməsində vergidən yayınmada təqsirləndirilən Şəki sakini, 1994-cü il təvəllüdlü Rəşid Məmmədovun məhkəməsi keçirilib. “Qafqazinfo”nun əldə etdiyi məlumata görə, orta təhsilli və 5 uşaq atası olan Rəşid Məmmədov Cinayət Məcəlləsinin 213.3-cü (Vergidən yayınma-xüsusilə külli miqdarda) maddəsi ilə təqsirləndirilib. Məhkəmədə bildirilib ki, Rəşid “Senton" MMC, “Titan W” MMC, “Şkala- Temp” MMC, “Bulus Termini” MMC, “Yamaxa-08" MMC, “Gurur İnşaat” MMC, “Teta-2016” MMC, “Xəzər-2016” MMC və sair çoxsaylı şirkətlərə rəhbərlik edib. Aparılan vergi yoxlamaları nəticəsində bu şirkətlərin dövlət büdcəsinə ümumilikdə 2 milyon 262 min 470 manat vergi borcunun formalaşması məlum olub və rəsmi sənədlərdə şirkətə rəhbərlik etdiyi məlum olan Rəşid Məmmədova cinayət işi açılıb. Cinayət işi üzrə keçirilən məhkəmə prosesində Rəşid Məmmədov həmin şirkətləri özünün yaratdığını deyib. Lakin o vergi borcunun məbləği ilə razılaşmayıb O bildirib ki, onun adına xeyli sayda müəssisə olduğu üçün öz adına yeni müəssisələr təsis etmək mümkün olmadığından digər müəssisələri müxtəlif vaxtlarda ayrı-ayrı adamlardan satın alıb Məhkəmə Rəşid Məmmədovu qeyd edilən maddə üzrə təqsirli bilib. Ona 2 il dövlət və yerli özünü idarəetmə orqanlarında rəhbər və ya məsul vəzifə tutma hüququndan məhrum edilməklə 5 il 6 ay həbs cəzası verilib. Həmçinin vergi qurumunun mülki iddiası təmin edilərək R.Məmmədovdan şirkətlər üzrə 2 milyon manata yaxın pul vəsaitinin dövlət büdcəsinə köçürülməsinə qərar verilib.