Ərazilərin Minalardan Təmizlənməsi üzrə Milli Agentlik (ANAMA) Ağdam və Ağcabədinin yaşayış məntəqələrində partlamamış hərbi sursatların zərərsizləşdirilməsinə başlayıb. 

 

APA TV-nin Qarabağ bürosunun xəbərinə görə, Ermənistan silahlı qüvvələrinin Ağdam rayonunun Çəmənli, Sarıcalı, Əfətli, Kolqışlaq, Zəngişalı, Şükürağalı, Rzalar Ergi qəsəbəsinə və Ağcabədi rayonunun Arazbar, Qiyaməddinli kəndlərinə, eləcə də Ağ Göl Milli Parkının ərazisinə atdığı partlamamış hərbi sursatları ANAMA-nın əməkdaşları zərərsizləşdirib:

 

ANAMA-nın əməkdaşı Ehtiram Cəfərov  deyir ki, bu gün Ağdam ərazisində 6 ədəd hərbi sursat partladılaraq zərərsizləşdirilib: “Bunlar müxtəlif tipli raketlər və top mərmiləridir. Hazırda partlatacağımız 240 mm-lik turba-reaktiv mühərrikli raket mərmisidir. Evin yaxınlığına düşdüyü üçün ərazidə partlatma işini həyata keçirmək mümkün olmur. Buna görə də məhdud daşıma üsulu ilə təhlükəsiz əraziyə aparılır, torpaq qazılaraq torpağın altında həmin sursat zərərsizləşdirilir”.

 

Ehtiram Cəfərov  cəbhəboyu ərazidə yaşayan əhalini gördükləri sursatlara, tanımadıqları əşyalara yaxınlaşmamalarını, dərhal “102” Çağrı Mərkəzinə xəbər vermələrini tövsiyə edir.