Muğanlı-İsmayıllı-Qəbələ avtomobil yolunun yenidən qurulması layihəsinə uyğun olaraq 1 tunel, 1-i asma körpü olmaqla 8 böyük və 5 kiçik körpünün inşası nəzərdə tutulur ki bu istiqamətdə artıq işlərə başlanılıb. Bunlardan Girdmançay, Talıstançay, Ax-ox çayı, Göyçay çayı və Vəndamçay üzərində yerləşən 5 mövcud körpü 4 zolağa uyğun yenidən qurularaq genişləndirilir. 3 körpü – Ağsuçay, Gülyançay və Dəmiraparançay isə trassanın dəyişdirilmiş yeni ox üzərində yenidən 4 zolağa uyğun layihələndirilib tikilir.

 

Azərbaycan Avtomobil Yolları Dövlət Agentliyindən  APA TV-yə verilən məlumata görə, yol boyu kiçik dərələr üzərində yerləşən 5 körpü sökülüb yeni boru şəkilli kiçik körpülərlə əvəzlənir.

 

Dövlət başçısının xüsusi tapşırığı ilə hazırlanan layihədə Muğanlı-İsmayıllı-Qəbələ yolu yenidənqurma nəticəsində 9.7 km qısalaraq 76.8 km təşkil edəcək.

 

Qurğular qüvvədə olan normativ yüklərə görə, 9 bal seysmikliyi nəzərə alınmaqla hesablanıb.