Azərbaycan Milli Elmlər Akademiyasının (AMEA) Rəyasət Heyətinin binasında akademiyanın ümumi yığıncağı keçirilib.

APA TV-nin məlumatına görə, yığıncağda “Azərbaycan Milli Elmlər Akademiyasının 2020-2025-ci illər üçün inkişaf proqramı”, AMEA-nın Nizamnaməsində dəyişiklik edilməsi, AMEA-nın Nizamnamə komissiyasının sədrinin və tərkibinin təsdiq edilməsi və akademiyanın 1-ci vitse-prezidentlərinin seçkisi və digər məsələlər müzakirə edilib.

Daha sonra AMEA-nın ümumi yığıncağında 1-ci vitse-prezident vəzifəsinə seçkilər üzrə səsvermənin nəticəsi açıqlanıb. Səsvermənin nəticəsinə görə, humanitar və ictimai elmlər üzrə akademik İsa Həbibbəyli, təbiət elmləri və dəqiq elmlər üzrə isə akademik İbrahim Quliyev AMEA-nın birinci vitse-prezidentləri seçiliblər. 

Akademiyanın prezidenti və iki 1-ci vitse-prezidentdən başqa rəyasət heyətinin tərkibinə akademiklər Tofiq Nağıyev, Dilqəm Tağıyev, Nərgiz Paşayeva, İradə Hüseynova, Rasim Əliquliyev, Əminağa Sadıqov, İsmayıl Hacıyev, Fuad Əliyev daxildir.