“Hökumətlər tərəfindən COVID 19-a qarşı görülən çevik tədbirlər” mövzusunda iki gün davam edən ASAN Qlobal Veb Forumun bağlanış sessiyası təşkil olunub.

 

APA TV-nin xəbərinə görə, natiqlər BMT-nin İqtisadi və Sosial Məsələlər üzrə Departamentinin (UN DESA) dövlət xidmətləri innovasiyası bölməsinin rəhbəri Con-Mari Kauzya və Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Aparat rəhbəri Azad Cəfərli olublar.

 

Azad Cəfərli dünyanın 25-dən çox ölkə iştirakçısının qoşulduğu Forumun pandemiya şəraitində dövlət idarəçiliyi və xidmətlərinin göstərilməsi, sosial innovasiyalar, logistika və s. sahələrdə cari vəziyyətin, perspektivlərin müzakirəsi, təcrübə mübadiləsi ilə əlaqədar beynəlxalq əməkdaşlığa töhfəsini qeyd edib. Diqqətə çatdırılıb ki, yeni innovasiya və informasiya əsrində reallıqların dərk olunnması üçün yeni platforma olan bu Forumda əldə olunmuş nəticələr və atılacaq addımlar pandemiyadan sonrakı dövrdə də  daha təhlükəsiz dünya quruculuğu üçün əhəmiyyətli rol oynayacaq.

 

Həmçinin bağlanış sessiyasında tədbir iştirakçılarına ünvanlanmış şifahi müraciətdə Forumun gedişatı, müzakirələr, yekunlar və gələcək əməkdaşlığa olan yanaşmalar, istəklər nəzərə alınaraq mövcud formatın davamlı həyata keçirilməsi və daha geniş rakursdan yenidən mövzuları əhatə etməsi üzrə razılıq ifadə edilib.

 

ASAN Qlobal Veb Forumun mütəmadi olaraq hər il keçirilməsi nəzərdə tutulur.

 

Forumun məqsədi pandemiya dövründə dövlət xidmətlərinin göstərilməsi sahəsində effektivliyi, əlçatanlığı, eyni zamanda pandemiya ilə mübarizə kontekstində və ondan sonrakı dövrdə sosial innovasiyaların, smart həllərin əvəzedilməz rolunu müzakirə etmək olub. İki günlük Forum açılış, bağlanış sessiyalarından və 4 fərqli mövzulu paneldən ibarət olub.