“AzerGold” Qapalı Səhmdar Cəmiyyətinin (QSC) istiqrazlarının mütəşəkkil kapital bazarlarına daxil olması münasibətilə Bakı Fond Birjasında (BFB) “Açılış zəngi” keçirilib.

 

APA TV xəbər verir ki, mərasimdə Bakı Fond Birjasın (BFB) İdarə Heyətinin sədri vəzifəsini icra edən Eldar Abdullayev, “AzerGold” Qapalı Səhmdar Cəmiyyətinin (QSC) Müşahidə Şurasının sədri Rövşən Nəcəf, “AzerGold” QSC-nin İdarə Heyəti sədrinin müavini Xəyyam Fərzəliyev, “PAŞA bank” ASC-nin İdarə Heyətinin sədri Taleh Kazımov, “PAŞA Kapital İnvestisiya Şirkəti” QSC-nin direktoru Ceyhun Hacıyev və Mərkəzi Bankın Baş direktoru Əli Əhmədov  iştirak ediblər.

 

Tədbirdə həmçinin, İqtisadiyyat naziri Mikayıl Cabbarov və emitent “AzerGold” QSC-nin İdarə Heyətinin sədri Zakir İbrahimov Cəmiyyətin Daşkəsən rayonunda yerləşən “Çovdar” mədənindən birbaşa canlı bağlantı vasitəsilə qatılıblar.

 

 “AzerGold” QSC-nin sədri Zakir İbrahimov Cəmiyyətin istiqrazlarla bağlı reallaşan təşəbbüsünün ölkə iqtisadiyyatının inkişafına töhfə vermək, vətəndaşlara mənfəətli və etibarlı investisiya imkanları yaratmaq məqsədi daşıdığını qeyd edib: “Sözügedən emissiyanın vətəndaşların milli iqtisadiyyat və dağ-mədən sənayesinin inkişafında pay sahibi olması üçün əlverişli fürsət olacaq”.

 

İqtisadiyyat naziri Mikayıl Cabbarov “AzerGold” istiqrazlarının tədavülə buraxılmasını kapital bazarları üzrə 2020-ci ilin ən mühüm hadisələrindən biri hesab edildiyini vurğulayıb. Nazir “AzerGold”un birja vasitəsilə həyata keçirdiyi istiqraz buraxılışının Azərbaycanda maliyyə sektorunun inkişafı istiqamətində aparılan tədbirlərin uğurlu nəticəsi olduğunu, maliyyə və dağ-mədən sektorunun inkişafına töhfə verməklə yanaşı, vətəndaşlar üçün yeni investisiya imkanlarının formalaşmasında xüsusi rol oynayacağını bildirib: “İstiqrazların düzgün yerləşdirilməsi müəssisənin dayanıqlığını, onun şəffaflığını təmin edəcək. Bu investorlar tərəfindən müəssisəyə olan inamın göstəricisidir. Həmin bazardan cəlb edilmiş vəsaitlər yeni yataqların işlənilməsinə, fəaliyyətinin genişləndirilməsinə  yönəldiləcək”.

 

Daha sonra Bakı Fond Birjasının İdarə Heyətinin sədri vəzifəsini müvəqqəti icra edən Eldar Abdullayev yeni istiqrazların korporativ qiymətli kağızlar bazarında maliyyə alətlərinin diversifikasiyasına səbəb olacağını və investorlar üçün daha geniş imkanların yarandığı münbit sərmayə mühitini formalaşdıracağını diqqətə çatdırıb.

 

Tədbirin sonunda emitent “Azergold” QSC-nin nümayəndəsi tərəfindən istiqrazların ilkin bazarda ticarətə buraxılışını simvolizə edən zəng çalınıb.

 

Beləliklə, istiqrazların Bakı Fond Birjasının ticarət platformasında ilkin ticarətinə başlanılıb.

 

İlahə Vəliyeva,

Musa Qulammirzəyev,

APA TV