Paytaxtın Nizami Rayonu 8 km. Cəmşid Naxçıvanski 94 B ünvanında yaşayan sakinlər uzun müddətdir su üzünə həsrət qalıb.

 

APA TV xəbər verir ki, sakinlərin sözlərinə görə, bir ilə yaxındır ki, hər gün saat 10:00-dan suları kəsilir və ya çox aşağı təzyiqlə verilir.  Bu təzyiqlə gələn su isə  nə qızdırıcını, nə də paltaryuyanı işlətmir.

 

Su olmadığı üçün adi məişət işlərini günlərlə görmək mümkün olmur. Bina sakini Arzu Kərimova deyir ki, bəzən isə bunun üçün qohum evlərinə üz tutmağa məcbur qalırlar:  “Bizim suyumuz bir ilə yaxındır ki, çox pisdir, həddindən artıq pisdir. Özünüz bilirsiniz ki, bu dəqiqə hər yerdə pandemiyadır.  Təkcə bizim blokda yox, digər bloklarda da problemdir. Səhər bir az verirlər, haradasa saat yarım. Ondan sonra kəsirlər. 12-dən, 11-dən  sonra ümumiyyətlə suyumuz olmur”.

 

Bina sakinlərindən olan Cavanşir Mikayılovun sözlərinə görə, xüsusən  səkkizinci və doqquzuncu mərtəbələrdə yaşayanlar su üzünə həsrət qalırlar. Hər kəs kommunal ödənişlərini vaxtında ödəyir, lakin əl yumağa su tapmırıq.  Dəfələrlə Nizami Rayon Su Kanal İdarəsinə edilən müraciətlər isə nəticəsiz qalıb: “Sular vaxtında gəlmir. Yaz vaxtında heç gəlmirdi. Saat 10:00 və ya 11:00 olurdu kəsilirdi. Saat doqquzdan başlayır, qızdırıcıya su çıxmır.  Bu vəziyyətdə necə olsun? Yuyunmaq lazımdır su yoxdur”. 

 

Sakinlərin sözlərinə görə, əvvəllər ehtiyat su saxlamaq üçün kiçik su çənləri olub.  Sonradan bu çənlər yığışdırılıb və bildirilib ki su daimi veriləcək, təzyiqi də normal olacaq. Ancaq o gündən nə daimi suları olmayıb, olan vaxt isə təzyiqi aşağı olub.

 

Problemlə  əlaqədar olaraq “Azərsu” Açıq Səhmdar Cəmiyyətinə müraciət etdik. Qurumun ictimaiyyətlə əlaqələr şöbəsinin rəhbəri Anar Cəbrayıllı hazırda həmin ərazidə su təchizatının sistemli aparıldığını bildirdi. Onun sözlərinə görə, problem adı çəkilən binanın daxili kommunikasiya xətlərində yarana bilər: “O binada şəxsən yoxlanış aparılacaq. Daxili xətlərində vəziyyət necədir deyə. Çünki oranın təzyiqi digər binaların təzyiqindən fərqlənmir. İnsanlar normal qaydada içməli su ilə təmin olunurlar. Həmin binanı fərdi qaydada yoxlayacaqlar. Ola bilər daxili xətlərində problem varsa onu da aradan qaldıracaqlar. Yəni orada insanlar tezdən gecə saatlarına qədər fasiləsiz olaraq su ilə təmin olunurlar”.

 

Hər halda biz problemi sakinlərin dilindən eşitdiyimiz şəkildə çatdırmağa çalışdıq.

 

Ümid edirik ki, Cəmşid Naxçıvanski 94 B ünvanında yaşayan sakinlərin su problemi binanın daxili su xətlərinin təmir olunması ilə aradan qalxar. 

 

Xələf Xələfov,

Əli Ələkbər,

APA TV