“Sabah Rusiyadan bir nümayəndə heyəti gələcək, Rusiya və Türkiyənin birgə yer alacağı atəşkəsə nəzarət mərkəzi ilə bağlı müzakirə aparılacaq”.

 

APA TV-nin xəbərinə görə, bunu bu gün keçirilən mətbuat konfransında Türkiyənin Xarici İşlər naziri Mövlud Çavuşoğlu bildirib.

 

Mövlud Çavuşoğlu deyib ki, atəşkəsə nəzarət üçün yaradılacaq mərkəz razılaşmanın yerinə yetirilməsi yönündə mühüm işlər görəcək: “Mərkəzin iş prinsipini ortaq işçi qrupu müəyyənləşdirəcək. Mərkəz Azərbaycanın müəyyənləşdirdiyi yerdə yerləşəcək. Bu atəşkəsin daimi sülhə vəsilə olmasını istəyərdik. Düşünürəm ki, əvvəllər atəşkəsi pozan Ermənistan artıq dərsini alıb. Bu prosesin nəticələrindən Ermənistan xalqı da faydalanacaq. Proses Azərbaycanın ərazi bütövlüyünün təmin olunması ilə nəticələnməlidir. Bölgədəki sabitlikdən Ermənistan da faydalanacaq”.

 

Türkiyənin Xarici İşlər naziri qeyd edib ki, Azərbaycanın istədiyi 30 il işğal altındakı torpaqlarını geri almaqdır. Bundan sonra Azərbaycan necə istəyirsə, Türkiyə onun yanında olacaq: “Minsk Qrupunun həmsədri Fransa birtərəfli mövqe tutur, hətta atəşkəsdən sonra da tərəfsizlik nümayiş etdirmir. Fransanın birtərəfli mövqeyinə baxmayaraq, Prezident İlham Əliyev Fransanın atəşkəs təşəbbüsünə də dəstək verib. Amma son razılaşmadan sonra da Fransa Ermənistanı dəstəkləyir, hətta Türkiyəni ittiham edir. Bundan sonrakı prosesdə heç bir ölkə haqsız Ermənistanı dəstəkləyərək, prosesi pozmağa çalışmamalıdır”.

 

Mövlud Çavuşoğlu Ermənistanın işğal edilmiş ərazilərin qaytarılması ilə bağlı təqvimə riayət etməyəcəyi halda hansı addımların atılacağına dair suala cavabında isə bildirib ki, işğal olunmuş torpaqların hamısı azad ediləcək: “Anlaşmanın altında Ermənistan baş nazirinin imzası var. Ermənistan bundan əvvəl 3 dəfə atəşkəsi pozdu, nəticəsini gördü. Yenə pozarlarsa, yenə də ağır nəticəsini görərlər. Bundan əvvəl Azərbaycan çox səbr etdi, bundan sonra seçim Ermənistanındır. Ya könüllü anlaşmaya əməl edərək işğal edilmiş torpaqlardan çıxacaqlar, ya da qəhrəman Azərbaycan Ordusu bu günə qədər olduğu kimi torpaqlarını alacaq. Həyatın gerçəkləri var. Ermənistan bölgədə sabitlik əldə olunandan sonra bundan necə faydalanacaq, o barədə düşünməlidir”.

 

“Atəşkəsə nəzarət mərkəzində Rusiyanın rolu necə olacaqsa, Türkiyənin də rolu elə olacaq”, - deyən Türkiyənin Xarici İşlər naziri onu da qeyd edib ki, sabah Rusiyadan Türkiyəyə gələcək heyətlə birgə işçi qrupu yaradılaraq fəaliyyət prinsipləri müəyyənləşdiriləcək: “Atəşkəsə nəzarət havadan, qurudan həyata keçiriləcək. Türkiyə və Rusiya birlikdə eyni missiyanı yerinə yetirəcək. Qardaş Azərbaycan xalqının da istəyi bu idi. Prezident İlham Əliyev də Türkiyənin rol almasının vacib olduğunu qeyd etmişdi”.

 

Mövlud Çavuşoğlu onu da deyib ki, atəşkəs anlaşmasını 3 ölkə imzalayıb. Hakimiyyətlər gəlib-keçir, ancaq anlaşmalar qalır. Ermənistan hökumətinin doğru seçimindən Ermənistan xalqı da faydalanacaq

 

Sonda türkiyəli qonaq şəhidlərə, mülki əhali arasında həlak olanlara rəhmət diləyib, yaralılara isə tezliklə sağlamlıqlarına qovuşmağı arzu edib. Mövlud Çavuşoğlu bildirib ki, Azərbaycan gücünü dosta da, düşmənə də göstərdi.

 

İlahə Vəliyeva,

Faiq Həsənov,

APA TV