Dağlıq Qarabağ bölgəsinin azərbaycanlı icması yeni bir layihəyə start verib.

 

APA TV-nin məlumatına görə, “Qarabağın harayı” adlı layihənin məqsədi müxtəlif dillərdə beynəlxalq təşkilatlara, ATƏT-in Minsk Qrupuna üzv ölkələrinin rəhbərlərinə, Dağlıq Qarabağın erməni icmasına video müraciət edərək, tezliklə azərbaycanlı məcburi köçkünlərin öz yurdlarına qayıtmaq arzularını onların diqqətinə çatdırmaqdır.

 

“Dağlıq Qarabağın azərbaycanlı icması” İctimai Birliyinin sədri Tural Gəncəliyev bildirib ki, əsas məqsəd Ermənistanın işğalçı siyasətini dünya ictimaiyyətinə göstərməkdir: “Müraciətin məqsədi ondan ibarətdir ki, dünya ictimaiyyətini, beynəlxalq təşkilatları biz daha çox Ermənistanın işğalına, təcavüzünə diqqət çəkək. Ümid edirik ki, Azərbaycan gəncləri müxtəlif xarici dillərdə video müraciətlər hazırlayaraq dünya ictimaiyyətinin diqqətini bu məsələyə çəkəcək”.

 

Tədbirdə ermənilərin  işğalçı siyasətindən əziyyət çəkən şəxslərin səsini dünyaya çatdırmaq məqsədilə hazırlanmış “Şuşaya yenidən günəş doğacaq” adlı video-çarx nümayiş olunub. Tədbir müzakirələrlə davam etdirilib.