Uşaq hekayələri, şeirləri fidanların həyata açılan ilk pəncərələridir. Uşaqlar onları daha çox cəlb edən hekayə və şeirlərin təsiri ilə böyüyür, irəliyə baxırlar. Uşaq ədəbiyyatı yeniyetməliyə çatmayan məktəblilərin düzgün böyüməsi baxımdan çox önəmlidir. Bu həm də uşaqların böyük ədəbiyyata keçidi üçün bir körpüdür. Amma nədənsə müasir dövrdə bu pəncərə Azərbaycanda yarımçıq açılır, ya da ümumiyyətlə açılmır. İki uşaq kitabının müəllifi Sevinc Nuruqızının fikrincə isə Azərbaycan uşaq ədəbiyyatı yazarları diqqətdən kənardadır. Bu sahədə yüksək potensialı olan yazarlarımızın kitabları çap edilsə də, tirajı az olur. “Təhsil” Nəşriyyatının baş direktoru Tural Axundov da düşünür ki, uşaq dilində yazarların sayı barmaqla sayılacaq qədərdir, lakin onlara da maddi dəstək olmadığından əlyazmalarının üstünü toz basır. Məsələ ilə bağlı Mədəniyyət Nazirliyi ilə əlaqə saxladıq. Sorğu da göndərdik. Amma cavab ala bilmədik. Niyəsə bu cür problemlər qabardılanda susmağa, ya da yoxa çıxmağa üstünlük verirlər. Reallıq isə budur ki, texnologiya dövrünün uşaqları Məlikməmmədlə, Qoğalla, Cırtdanla, Tık-tık xanımla, Göyçək Fatma ilə qane olmurlar. İndi bizim daha müasir qəhrəmanlara ehtiyacımız var. Ancaq bunu kim və necə edəcək? Hələlik heç kim bu suala cavab tapa bilmir.