“Beynəlxalq Ordu Oyunları - 2020” yarışları çərçivəsində Azərbaycan ərazi sularında keçirilən “Dəniz kuboku” müsabiqəsinin bağlanış mərasimi keçirilib.

 

Müdafiə Nazirliyindən APA TV-yə verilən xəbərə görə, tədbirdə Müdafiə nazirinin müavini general-leytenant Kərim Vəliyev, Müdafiə nazirinin maddi-texniki təminat üzrə müavini vəzifəsini icra edən general-leytenant Nizam Osmanov, Rusiyanın Müdafiə nazirinin birinci müavini ordu generalı Ruslan Tsalikov və digər qonaqlar iştirak ediblər.

“Dəniz kuboku” müsabiqəsi Təşkilat Komitəsinin sədri, general-leytenant Nizami Osmanov çıxış edərək müsabiqənin gedişatı və nəticələrindən danışıb.

Azərbaycan və “Dəniz kuboku” haqqında videoçarx nümayiş edildikdən sonra qalib komandalara kubok, medallar və qiymətli hədiyyələr təqdim olunub.
Yarışda bərabər xal toplayaraq birinciliyi paylaşan Azərbaycan və Rusiyanın dövlət himnləri səsləndirilib.

Ordu generalı Ruslan Tsalikov “Dəniz kuboku” müsabiqəsinin yüksək səviyyədə təşkilinə və qonaqpərvərliyə görə Azərbaycan dövlətinin rəhbərliyinə təşəkkürünü bildirib.

Tədbirdə yekun nitqi ilə çıxış edən general-leytenant Kərim Vəliyev müsabiqənin Xəzəryanı ölkələrin hərbi dənizçilərinin daha yaxından tanış olmaları, qarşılıqlı münasibətlər və əməkdaşlığın güclənməsi, hərbçilər arasında yoldaşlıq mühitinin yaranmasına xidmət etdiyini bildirib, tədbir iştirakçılarına Müdafiə naziri general-polkovnik Zakir Həsənovun təbriklərini çatdırıb və “Dəniz kuboku” müsabiqəsini bağlı elan edib.