Döyüşlər zamanı Goranboy rayonu da zərərçəkən rayonlardandır. Ermənistan ordusunun təxribatı nəticəsində Goranboy rayonunun bir neçə kənd və qəsəbələrinin iriçaplı silahlardan atəşə tutulması nəticəsində rayona ziyan dəyib. Hazırda rayona İşçi qrupunun nümayəndələri cəlb olunub, dəymiş ziyanın hesablanmasına başlanılıb.

 

APA TV-nin yerli bürosunun xəbərinə görə, Goranboy rayonu və Naftalan şəhəri üzrə işçi qrupun rəhbəri, Fövqəladə Hallar Nazirliyinin Tikintində Təhlükəsizliyə nəzarət Dövlət Agentliyinin rəis müavini Elxan Əsədov Naftalan şəhərinə qismən az ziyan dəydiyini deyir: "Naftalan şəhərində işlər artıq başa çatıb. Orda dağıntılar nisbətən azdır. 4 obyektə, 3 yaşayış evinə və 1 qeyri-yaşayış binasına ziyan dəyib".

 

Qiymətləndirmə işləri Goranboy rayonunda da davam etdirilir. Rayonun 29 yaşayış məntəqəsi dağıntılara məruz qalıb və bu məntəqələrə 700-dən çox mərmi düşüb: “Apardığımız müşahidələr onu göstərir ki, bu ərazilərdə stasionar silahlı qüvvələrin yerləşdiyi yerlər yoxdur. Əldə etdiyimiz məlumatlara görə, Goranboy rayonu ərazisində 250-dək fərdi yaşayış evi və digər sosial obyektlər dağılıb".

 

İşçi qrupunun rəsmisi qiymətləndirmə zamanı belə obyektlərin sayının artacağını da istisna etmir: “Qiymətləndirmə aparılarkən ev sahibləri də müayinələrdə iştirak edir. Ümid edirik, bu işlər 20 gün müddətində başa çatdırılacaq. Tərtib olunmuş aktlar nəticəsində dəymiş ziyanın aradan qaldırılması üçün lazım olan digər proseslər də həyata keçiriləcək. Komissiya vətəndaşların daşınmaz əmlakları ilə bərabər, həm də mal-qaranın məhv olunması faktlarını, vətəndaşların və digər orqanların nəqliyyat vasitələrinin zədələnməsi faktlarını da qeydə alır".

 

Qeyd edək ki noyabrın 6-da Prezident İlham Əliyev "2020-ci il sentyabrın 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə, dövlət əmlakına, o cümlədən infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsi və aradan qaldırılması ilə bağlı tədbirlər haqqında" Sərəncam imzalayıb.

 

Fuad Nazimoğlu

Mehdi Məmmədov

APA TV