Göygöldə “Yaz-yay fəsillərində sel təhlükəsi” mövzusunda tədbir keçirilib. Tədbir rayonun Topalhəsənli kəndində ötən il təbii fəlakətin baş verdiyi ərazidə baş tutub. FHN əməkdaşları kənd sakinlərinə təbiət hadisəsi baş verən zaman ilk hansı addımları atacaqlarını izah ediblər. Tədbirin keçirilməsində məqsəd intensiv yağıntıların xarakterik olduğu yaz-yay aylarında çaylarda yarana biləcək sel və daşqınlar zamanı zəruri təhlükəsizlik qaydaları barədə vətəndaşlara müvafiq biliklərin verilməsi olub. Yerli icra nümayəndəliyinin, o cümlədən bələdiyyələrin, kənd sakinlərinin və ictimai iaşə obyektlərinin əməkdaşlarının da iştirak etdiyi görüşlərdə sel və daşqın təhlükəsindən qorunmağın yolları, bu təhlükə ilə üzləşdikdə davranış qaydaları barədə ətraflı məlumatlar verilib, mövzuya dair məlumatlandırıcı çap materialları paylanılıb. Qeyd edək ki , Fövqəladə Hallar Nazirliyi tərəfindən əhalinin fövqəladə hallarla bağlı maarifləndirilməsi məqsədilə bu kimi tədbirlər müntəzəm olaraq keçirilir.

Fuad Nazimoğlu, Elşad Cəfər, APA TV