Ölkəmizdə səfərdə olan Fransa Milli Assambleyasının nümayəndə heyəti Gəncəyə səfər edib.

 

APA TV-nin yerli bürosunun xəbərinə görə, Fransa Parlamentinin Azərbaycanla dostluq qrupunun vitse-prezidenti Jerom Lamberin başçılıq etdiyi nümayəndə heyəti cəbhə zonasından kənarda yerləşən, Azərbaycanın ikinci böyük şəhəri Gəncənin mərkəzi hissəsində Ermənistan silahlı qüvvələrinin raket hücumlarının səbəb olduğu cinayətin izləri ilə tanış olub.

 

Fransa nümayəndə heyətini Azərbaycan-Fransa parlamentlərarası əlaqələr üzrə işçi qrupunun  rəhbəri Soltan Məmmədov və digər rəsmi şəxslər müşayiət ediblər:

 

Fransa Parlamentinin Azərbaycanla dostluq qrupunun vitse-prezidenti Jerom Lamberin Azərbaycana dəstək üçün gəldiklərini bildirib: “Bizə məlumat verildi ki, Ermənistan artıq məğlub olaraq kapitulyasiya sənədini imzalayıb. Sülh gözəldir, lakin hüquqlar çərçivəsində olan sülh daha gözəldir. Biz Gəncəyə də gəlməyə qərar verdik. Çünki Gəncədə də hamımızın bildiyi hadisələr baş verib. Bir neçə gün əvvəl isə bu konfliktə son qoyuldu. Mülki əhalinin yaşadığı ərazilərin bilərəkdən bombalanması müharibə cinayətidir. Gəncədə gördüyümüz hadisələr isə bizə bunu bir daha sübut edir”. 

 

Dostluq qrupunun vitse-prezidenti Fransanın Qarabağ münaqişəsi ilə bağlı mövqeyini heç vaxt dəyişmədiyini vurğulayıb. Onun sözlərinə görə, Fransa 90-cı illərdə BMT tərəfindən hazırlanmış qətnaməni imzalayıb və problemin beynəlxalq hüquq çərçivəsində həll edilməsini istəyib: “Qeyd etmək lazımdır ki, Fransada çox güclü erməni diasporu mövcuddur və müxtəlif ictimai-siyasi dairələrə təsir gücünə malikdir. Əgər Ermənistan bu gün pis vəziyyətdədirsə, bu, onun hökumətinin fəaliyyətinin nəticəsidir. Bizim yer üzündə əziyyət çəkən bütün xalqlara qarşı humanitar fəaliyyətimiz olmalıdır. Lakin biz hər zaman BMT-nin imzaladığı və Fransanın ona səs verdiyi qətnamələrin tərəfindəyik və hər zaman beynəlxalq hüququ dəstəkləyəcəyik”.

 

Fransa Prezidentinin və Fransanın Xarici İşlər nazirinin açıq-aşkar erməni tərəfini dəstəkləmələri və Şuşanın adını “Şuşi” kimi çəkmələri ilə bağlı sualı cavablandıran parlamentari adların tələffüzü ilə bağlı göstərilən həssaslığı başa düşdüyünü deyib: “25 il ərzində bütün bu danışıqlar prosesi heç bir nəticə verməyib. İndi isə vəziyyət dəyişib. Azərbaycan hərbi gücdən istifadə edərək öz torpaqlarını azad edərək, sülhü və beynəlxalq hüququ bərqərar edib. Fransa həm Ermənistanın, həm də Azərbaycanın tərəfində duracaq ki, sülh prosesi davam etsin və bu cür konfliktli hallar daha baş verməsin. Hökumətlər atəşkəs imzalayıb və artıq xalqların öz aralarında sülh şəraitində yaşamasını bacarması lazımdır. Fransa da kim sülh istəyirsə, onun yanındadır”.

 

Qeyd edək ki döyüş meydanında məğlubiyyətə uğrayan Ermənistan silahlı qüvvələri oktyabrın 11-də və 17-də Ermənistan ərazisindən Azərbaycanın ikinci böyük şəhəri olan Gəncəni məqsədli şəkildə ballistik raketlərlə atəşə tutub. Gecə saatlarında yatmış şəhərə edilmiş raket hücumları nəticəsində 1 körpə, 5 uşaq, 10 qadın da olmaqla 30-a yaxın dinc sakin həlak olub, 90-dan çox insan yaralanıb.

 

Fuad Nazimoğlu

Mehdi Məmmədov

APA TV