Ermənistan ordusunun Gəncə şəhərini atəşə tutması nəticəsində şəhərə dəymiş ziyanın hesablanmasına başlanılıb. Artıq işçi qrupu şəhərə cəlb olunub. İşçi qrupları raket düşən ərazilərdədir. Hesablamalara başlanılıb. Onu da qeyd edim ki, Ermənistan ordusunun Gəncə şəhərini atəşə tutması nəticəsində şəhərdə iki mindən artıq evə ziyan dəyib.

 

Gəncə şəhəri üzrə işçi qrupun rəhbəri Ədalət Əliyev APA TV-yə açıqlamasında bildirib ki, şəhər düşmən təxribatı nəticəsində ən çox raket zərbəsinə məruz qalan ərazilərdən biridir. Onun sözlərinə görə, ilkin hesablamalara əsasən şəhərdə 2000-dən çox fərdi ev və çoxmənzilli binalara ziyan dəyib, xeyli sayda avtomobil yararsız hala düşüb.

 

Artıq dünəndən etibarən yaşayış və qeyri yaşayış sahələrində qiymətləndirmə işlərinə start verilib. Qiymətləndirmə ev sahiblərinin iştirakı ilə həyata keçirilir.

 

Dəymiş ziyanın məbləği işlər yekunlaşandan sonra mütəxəssislər tərəfindən müəyyən olunacaq. Qiymətləndirmə işləri dekabrın 10-dək tamamlanmalıdır: “Gəncə şəhəri ən çox raket zərbələrinə məruz qalmış ərazilərimizdən biridir. İlkin hesablamalara əsasən, yəni, aidiyyəti üzrə qurumların, yerli icra hakimiyyəti orqanları nümayəndələrinin iştirakı ilə burada işlər artıq başlanılıb və onlar tərəfindən tərtib olunmuş ilkin hesablamalara əsasən hardasa iki mindən yuxarı fərdi evə və eyni zamanda, çoxmənzilli binalara müxtəlif dərəcələrdə zərər dəymişdir.  Biz də dünəndən başlayaraq bu evlərdə, digər əmlak və eyni zamanda sahibkarlıq subyektlərinə sahib olan qeyri-yaşayış əmlakları və sahələrində də qiymətləndirmə həyata keçirəcəyik”.

 

Qeyd edək ki, noyabrın 6-da Prezident İlham Əliyevin imzaladığı sərəncama əsasən, Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə, dövlət əmlakına, o cümlədən infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsini və aradan qaldırılmasını təmin etmək məqsədilə Dövlət Komissiyası yaradılıb. Müxtəlif dövlət qurumlarının əməkdaşları və mütəxəssislərdən ibarət işçi qruplar vəziyyətlə yerində tanış olmaq və qiymətləndirmə işlərinin aparılması məqsədilə Gəncə-Mingəçevir, Goranboy, Naftalan və digər şəhər və rayonlara ezam olunublar.

 

Fuad Nazimoğlu

Mehdi Məmmədov

APA TV