Gəncə şəhər Baş Polis İdarəsinin əməkdaşlarının daxil olan məlumat əsasında keçirdikləri əməliyyat-axtarış tədbirləri nəticəsində şəhər sakini, əvvəllər Azərbaycan, Rusiya və Gürcüstanda dəfələrlə məhkum olunmuş, 42 yaşlı Zaur  İsmayılov şəhər ərazisindəki çayxanaların birində saxlanılıb. Kriminal aləmdə “Krıtı Malış” ləqəbi ilə tanınan Zaur İsmayılov Kəpəz rayon Polis İdarəsinə gətirilib.

APA TV xəbər verir ki, Kəpəz rayon Polis İdarəsində onun üzərində şəxsi axtarış keçirilən zaman 1 ədəd, atəşə yararlı, kustar üsulla hazırlanmış, “Naqan” tipli revolver tapança, həmin tapançanın barabanından isə 4 ədəd atəşə yararlı  9 mm kalibrli “Makarov” tipli tapançanın patronları aşkar edilərək götürülüb.

Ömrünün çox hissəsini dəmir barmaqlılar arasında keçirən Zaur İsmayılov düşməninin çox olmasını da gizlətməyib.

Hazırda Zaur İsmayılovun həmin odlu silahdan hər hansı cinayətdə istifadə edib etmədiyi araşdırılır.