Lənkəranda narkotik vasitələrin satışı ilə məşğul olan şəxslərə qarşı keçirilən növbəti əməliyyat tədbirləri zamanı daha 8 nəfər saxlanılıb. 

APA TV-nin xəbərinə görə, Lənkəran Şəhər Rayon Polis Şöbəsinin əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində Masallı rayonunun Ərkivan qəsəbəsinin sakini, əvvəllər də məhkum olunmuş Azər Talıbov saxlanılıb. Onun əlindəki torbadan ayrı-ayrı bağlamalarda ümumilikdə 10 kiloqramdan artıq heroin aşkarlanaraq götürülüb.  

Keçirilən digər əməliyyatlar zamanı isə narkotik vasitələrin qanunsuz dövriyyəsində şübhəli bilinən daha 7 nəfər rayon sakini saxlanılıb. Şəxsi axtarış zamanı onlardan hazır bükümlərdə qablaşdırılmış müxtəlif növ narkotik vasitələr və elektron tərəzilər aşkarlanaraq götürülüb.  

Faktlarla bağlı araşdırma aparılır.

Tural Kərimov,
Rövşən Əzimov,
APA TV