Lənkəranda yanğın nəticəsində 2 uşaq həyatını itirib.

APA TV-nin cənub bürosunun verdiyi məlumata görə, yanğın hadisəsi Səttərxan küçəsi, ev 8 ünvanında qeydə alınıb.

Hadisə yerinə FHN-nin Dövlət Yanğından Mühafizə Xidmətinin yanğından mühafizə bölmələri və Cənub Regional Mərkəzinin xilasediciləri əraziyə cəlb olunub. Yanğın nəticəsində ümumi sahəsi 81 kvadratmetr olan evin yanar konstruksiyaları yanıb. Yanğın zamanı içəridə köməksiz vəziyyətdə qalan 3  uşaq xilas edilərək xəstəxanaya yerləşdirilib: 

Hadisə şahidi Gülnarə Məmmədovanın sözlərinə görə, yanğın anidən baş verib. Hadisə zamanı evdə yalnız 3 uşaq olub: “Tez FHN-ə zəng vurduq, qaçdıq küçəyə, uşaqların nənəsi küçədə idi, anası həyətdə idi. Sonra yanğınsöndürən gəldi, girdilər içəri. Uşağın birini salamat çıxardılar. Dedilər 2 uşaqdır, dedim yox, mən yaxın qonşuyam 3 uşaqdır. Uşağın birini də çıxardılar. Sonra girib axtardılar, birini də haçandan-haçana soyuducunun yanından çıxardılar”.

Lənkəran Rayon Mərkəzi Xəstəxanasından verilən məlumata görə, xəstəxanaya gətirilən uşaqlardan ikisinin - 2014-cü il təvəllüdlü Milada Aleksandroviç Quds və 2019-cu il təvəllüdlü Emil Cəsarət oğlu Qudsun həyati əlamətləri olmayıb. Onların meyiti aidiyyəti üzrə təhvil verilib.

2 yaşlı Artyom Aleksandroviç Quds isə Reanimasiya şöbəsinə yerləşdirilib və vəziyyəti ağırdır.

Qeyd edək ki, yaxınlıqdakı tikililər yanğından mühafizə olunaraq alov söndürülüb.

Faktla bağlı araşdırma aparılır.

Tural Kərimov

Rövşən Əzimov

APA TV