Masallıda 2 çayın və suötürücü kanalların daşması nəticəsində 16 nəfər təxliyə olunub. 
APA TV-nin cənub bürosunun verdiyi məlumata görə, ötən gündən başlayan güclü yağış nəticəsində Masallı rayonundan keçən Alvadı və Tatyan çayları məcrasından çıxıb, eləcə də Bədəlan, Mollaoba, Boradigah, Rüdəkənar kəndlərində olan suötürücü kanallar daşıb. Təbii fəlakət zamanı 23 evə ziyan dəyib. Yağıntıların törətdiyi fəsadların aradan qaldırılması üçün dərhal Fövqəladə Hallar Nazirliyinin Cənub Regional Mərkəzi, Mülki müdafiə qoşunları, Xüsusi Riskli Xilasetmə Xidməti, Kiçikhəcmli Gəmilərə Nəzarət və Sularda Xilasetmə Dövlət Xidməti və Dövlət Yanğından Mühafizə Xidmətinin müvafiq qüvvə və texnikaları adıçəkilən kəndlərdə xilasetmə, suçəkmə və digər təxirəsalınmaz təcili tədbirlərin həyata keçirilməsinə cəlb olunub. Görülən operativ və təxirəsalınmaz tədbirlər nəticəsində 16 nəfər təxliyə edilib. 
Masallı Rayon İcra Hakimiyyəti Başçısının Təzə Alvadı kənd ərazisi üzrə icra nümayəndəsi Fəxrəddin Məmmədov deyir ki, bir neçə gündür ki, güclü yağışlar yağır: “Gecə 4-5-ə işləmiş vaxtlarda məlumat aldıq ki, artıq çay məcrasından çıxmışdır. Dərhal Fövqəladə Hallar Nazirliyinin qaynar xəttinə məlumat bildirdik, sağ olsunlar vaxtında gəldilər. 23 evə ziyan dəyib, birinci mərtəbəsi tamamilə suyun altında qalıb. Təxliyə olanların sayı 16 nəfərdir. Əkin sahələrinə ziyan dəyib, 3 hektara yaxın kartof sahəsi  suyun altında qalıb. Bir təsərrüfata 100-ə yaxın xırda buynuzlu tələf olub”.
Təbii hadisənin fəsadları və ziyanın həcmi barədə hələlik tam məlumat yoxdur. Müvafiq komissiya təşkil olunaraq araşdırma aparılacaq və dəymiş ziyanın məbləği müəyyənləşdiriləcək. 
Tural Kərimov
Rövşən Əzimov
APA TV. Masallı