Yevlax şəhər İcra Hakimiyyətinin sabiq başçısı Qoca Səmədov, Ağstafanın sabiq icra başçısı Nizaməddin Quliyev və onun birinci müavini olmuş Ramiz Tatarov məhkəmə qarşısına çıxarılıb.

APA TV-nin məlumatına görə, Səbail rayon Məhkəməsində həmin şəxslər  barəsində həbs qətimkan tədbirinin seçilməsinə dair Dövlət Təhlükəsizliyi Xidməti (DTX) tərəfindən verilmiş təqdimata baxılıb. Hakim Rəna Qafarovanın sədrliyi ilə keçirilən məhkəmənin qərarı ilə hər üç şəxs barəsində 4 ay müddətinə həbs qətimkan tədbiri seçilib.  

Qeyd edək ki, yuxarıda adı çəkilən şəxslər vəzifə səlahiyyətlərindən sui-istifadə etmə, külli miqdarda təkrar rüşvət alma, mənimsəmə və digər faktlara görə Dövlət Təhlükəsizliyi Xidmətində Cinayət Məcəlləsinin müvafiq maddələri ilə başlanılmış cinayət işləri üzrə şübhəli şəxs qismində saxlanılıblar.