31 saylı Suraxanı İkinci Seçki Dairəsindən deputatlığa namizəd, Milli Dirçəliş Hərəkatı Partiyasının sədri Fərəc Quliyevlə bağlı şikayətə hazırda Mərkəzi Seçki Komissiyasının Ekspert qrupu tərəfindən baxılır.

 

Bunu APA-ya açıqlamasında MSK sədrinin müavini Rövzət Qasımov bildirib.

 

R.Qasımov deyib ki, indiyə qədər MSK tarixində rüşvətlə bağlı məsələnin olmasını xatırlamır: “Ekspert qrupu nə zaman məsələnin müzakirəyə çıxarılmasını təklif etsə, MSK qanunvericiliyin tələbinə uyğun vaxtda məsələyə baxacaq və qərar verəcək”.

 

R.Qasımov onu da qeyd edib ki, Fərəc Quliyevin namizədliyinin ləğv edilib-edilməməsinə də MSK qərar verəcək.

 

Qeyd edək ki, 31 saylı Suraxanı İkinci Seçki Dairəsindən deputatlığa namizəd Mehman Hüseynov sosial şəbəkələrdə həmin dairədən deputatlığa namizəd olan Fərəc Quliyevlə danışığının səs yazısını yayıb. Səs yazısında Fərəc Quliyevin Mehman Hüseynova 10-15 min manat pul təklifi əksini tapıb. Fərəc Quliyev isə sonradan məsələyə münasibət bildirərək həmin pulu Mehman Hüseynovun müalicəsi üçün təklif etdiyini, Mehman Hüseynovun danışığın səs yazısını montaj edərək yaydığını bildirib.

 

Mehman Hüseynov bununla əlaqədar MSK-ya müraciət edib.