Rusiyada ölkənin əsas yeni il küknarı təntənəli şəkildə Kremlə gətirilib. 90 yaşı olan dekorativ ağac Moskva ətrafındakı Şçelkovo ərazisindəki meşəlikdən TIR-la gətirilib.

 

APA TV xəbər verir ki, ağacın gətirilmə mərasimini maraqlı edən məqamlardan biri də sürücünün şaxta baba geyimində olmasıdır. Rəsmilərin verdiyi məlumata görə, ağacın uzunluğu 28 metr, eni 10 metr, diametri isə 56 santimetrdir. O da bildirilib ki, mərasim Kreml xüsusi mühafizə xidmətinin əməkdaşları tərəfindən təntənəli olaraq müşayiət olunub.

 

Yerli mediaya açıqlama verən Rusiya Prezident Administrasiyasının Baş Əməliyyat İdarəsinin rəis müavini Anatoli Koçanov mərasimin təşkilatçılarına xüsusi minnətdarlıq bildirib.