Daxili İşlər Nazirliyi Baş İctimai Təhlükəsizlik İdarəsi Abşeron Rayon Polis İdarəsinin əməkdaşları ilə birgə Xırdalan şəhərində əhali arasında profilaktik tədbir keçirib.

DİN mətbuat xidmətindən APA TV-yə verilən məlumata görə, xüsusi karantin rejimi ilə əlaqədar tətbiq edilən qadağalara əməl edilməsinə nəzarətin gücləndirilməsi məqsədilə keçirilən tədbirdən əvvəl şəxsi heyət rəhbər vəzifəli polis zabitləri tərəfindən müvafiq qaydada təlimatlandırılıb.

Tədbir zamanı Xırdalan şəhərində karantin qaydalarına əməl olunmadan fəaliyyət göstərən obyektlər və bərbərxanalar aşkar olunub. Həmçinin müvafiq icazəsi olmadan yaşayış yerini tərk edən şəxslər də müəyyən edilərək cəzalandırılıb.

 

Tədbirdə həmçinin icazə əsasında yaşayış yerlərini tərk edən, amma tibbi maskadan istifadə etməyən şəxslərlə də polislər maarifləndirici söhbətlər aparıb. Belə şəxslər polislər tərəfindən tibbi maska ilə təmin olunublar. Tibbi maska ilə təmin edilən şəxslər göstərilən diqqət və qayğıya görə daxili işlər orqanlarının şəxsi heyətinə minnətdarlıqlarını bildiriblər.