Masallıda qanunsuz olaraq ov tüfəngi gəzdirən 29 yaşlı gənc saxlanılıb.

APA Tv-nin cənub bürosunun verdiyi məlumata görə, Masallı şəhər sakini, 1991-ci il təvəllüdlü Orxan Xanbaba oğlu Əlibəyli qanunsuz şəkildə odlu silahı əldə edib gəzdirməkdə şübhəli olduğundan Masallı RPŞ-nin əməkdaşları tərəfindən əməliyyat–axtarış tədbirləri keçirilib.

Nəticədə şəhər ərazisində saxlanılan gəncin üzərinə şəxsi axtarış keçirilən zaman əynində olan qara rəngli gödəkçənin iç hissəsindən 1 ədəd nömrəsi silinmiş, zavod üsulu ilə istehsal olunmuş 16 kalibrli, "İJ-58" modelli ov tüfəngi tapılıb. Çaxmaqsız, hamar qoşalüləli, lüləsi və qundağı kustar üsulla kəsilmiş odlu silah ondan götürülüb.

Faktla bağlı Masallı RPŞ-nin İstintaq Bölməsində araşdırma aparılır.