Tibbi Ərazi Bölmələrini İdarəetmə Birliyi və Qaçqınların və Məcburi Köçkünlərin İşləri üzrə Dövlət Komitəsi arasında qarşılıqlı əməkdaşlıq haqqında memorandum imzalanıb. Memorandumu TƏBİB-in İdarə Heyətinin sədri Vüqar Qurbanov və Qaçqınların və Məcburi Köçkünlərin İşləri üzrə Dövlət Komitəsi sədrinin müavini Fuad Hüseynov imzalayıblar: “Bu memorandumun imzalanmasında məqsəd “Böyük Qayıdış”a töhfə vermək, artıq köhnə məcburi köçkün soydaşlarımızı öz doğma torpaqlarına sağlam tərzdə köçürülməsini təmin etməkdir”. TƏBİB-in idarə heyətinin sədri Vüqar Qurbanov isə bildirib ki, Zəngilandakı Ailə Sağlamlıq Mərkəzi artıq istifadəyə hazır vəziyyətdədir: “Ailə sağlamlıq mərkəzi tam təchizatlı bir mərkəzdir və orda həkim, orta tibb işçisi elektrokardioqramma müayinəsi, ultra-səs müayinəsi və digər lazımi müayinələr həyata keçiriləcək”. Qeyd edək ki , TƏBİB tərəfindən memorandum çərçivəsində işğaldan azad olunmuş ərazilərə köçürülən şəxslərin ümumi tibbi müayinəsinin təşkili, həmçinin uşaqların təsdiqlənmiş Peyvənd Təqviminə əsasən müxtəlif yoluxucu xəstəliklər əleyhinə immunizasiyanın aparılması baş tutacaq. Memorandumun müddəti imzalandığı tarixdən üç il ardıcıl davam edəcək.