Amerika Birləşmiş Ştatlarının hərbçilərinin Ermənistana təlim məqsədilə gəlişi bölgədə siyasi prosesləri daha da mürəkkəbləşdirib. Belə ki, vəziyyətdən narahat olan Kreml bildirib ki, “qərblilər” regionun taleyi ilə maraqlanmır və onların məqsədi Rusiya və Ermənistan arasında nifaq salmaq və Moskvanın təsirini zəiflətməkdir. Ermənistanın baş naziri Nikol Paşinyan isə ölkəsinin təhlükəsizliyinin Rusiyadan asılı hala salınmasını "strateji səhv" adlandırıb və verilən hər hansı qərarın Ermənistanın daxili işi olduğunu bildirib. Bir çox hərbi ekspertlər düşünürlər ki, ABŞ-dan gələn hərbçilər təlim-tədris, təşkilati işlər, hərbi məsləhətçi, müşavir və s. adlar altında Ermənistanda qalacaqlar. O da bildirilir ki, ABŞ-la birgə keçiriləcək təlimlər Qərbin Cənubi Qafqazda Ermənistan üzərindən Rusiyaya qarşı ikinci cəbhə açması deməkdir. Qeyd edək ki, ABŞ Ordusunun Avropa və Afrika Komandanlığından verilən məlumata görə, sentyabrın 11-dən 20-dək təxminən 85 ABŞ hərbçisi Ermənistanla birgə keçirləcək hərbi təlimdə iştirak edəcək. Maraqlıdır, Azərbaycan və Ermənistan sərhədində Avropa İttifaqının monitorinq missiyası, Ermənistanda Rusiya hərbi bazaları, üstəlik ABŞ hərbçilərinin də Ermənistana gəlməsi hansı proseslərdən xəbər verir? Bölgədə həm Avropa, həm ABŞ, həm də Rusiya hərbi güclərinin olması Ermənistanı növbəti Rusiya-Qərb savaş meydanına çevirə bilərmi? Bəs bu hərbi güclərin Ermənistanda olması ölkəmiz üçün hansısa təhlükə vəd edirmi? Məsələ ilə bağlı kanalımıza açıqlama verən hərbi ekspert Ədalət Verdiyev bildirib ki, Ermənistanın silahlanmasında və hərbi infrastrukturunun qurulmasında böyük rolu olmasına baxmayaraq, keçirilən təlimlər Rusiyaya qarşı yönəlib. O əlavə edib ki, Moskva Qərbdən gələn hərbçilərə görə narahatdır və Ermənistanda böyük qarşıdurmalar ola bilər. Azərbaycan üçün yarana biləcək təhlükəyə gəlincə isə Ədalət Verdiyev bildirib ki, Ermənistanda olan hər hansı xarici ölkənin hərbçiləri İrəvanın törətdiyi təxribatlara görə cavabdehlik daşımaq istəmir və onların Azərbaycana qarşı savaşması mümkün görünmür. “Paşinyanın apardığı siyasət nəticəsində müharibə aparan güc mərkəzlərinin Ermənistanda cəmləşməsi ölkənin dövlətçiliyini sual altına qoyur”. Bunu isə siyasi şərhçi İlyas Hüseynov deyib. O əlavə edib ki, Ermənistanı Suriya və Ukrayna ssenarisi gözləyə bilər. İlyas Hüseynov onu da əlavə edib ki, müharibədən sonra rəsmi Bakı dəfələrlə İrəvana sülh təklifləri versə də, Ermənistanın yürütdüyü destruktiv siyasət regional sülhə təhdid törədir. Siyasi şərhçi vurğulayıb ki, Ermənistanın atdığı addımlar nəticəsində yaranmış gərginliyə görə preventin tədbirlər görmək zərurəti yaranır. Fuad SAdıqov APA TV