Qafqaz Müsəlmanları İdarəsinin təşkilatçılığı ilə "Müasir dünyanın problemləri: nifrətə çağırış, terror, ekstremizm, İslamafobiya və Ermənistanın Azərbaycana qarşı təcavüzü" mövzusunda beynəlxalq konfrans keçirilib.

 

APA TV-nin xəbərinə görə, tədbirdə çıxış edən QMİ Sədri Şeyxülislam Allahşükür Paşazadə Azərbaycan Prezidenti İlham Əliyevi, Birinci vitse-prezident Mehriban xanım Əliyevanı və Azərbaycan xalqını Qələbə münasibətilə təbrik edib.

 

QMİ sədri Azərbaycanın dünya birliyi tərəfindən tanınan ərazi bütövlüyünü bərpa etmək, öz əzəli torpaqlarını erməni işğalından azad etmək uğrunda haqq mübarizəsinə verdikləri siyasi-mənəvi dəstəyə görə, İslam Əməkdaşlıq Təşkilatına, Türkiyə, İran, Pakistan və Əfqanıstanın dövlət rəhbərləri və xalqlarına, İslam aləminin tanınmış şəxsiyyətlərinə, nüfuzlu dini liderlərinə və ictimaiyyət xadimlərinə dəstək bəyanatlarına və həmrəylik məktublarına görə dərin minnətdarlıq ifadə edib: “Ermənistanın öz işğalçılıq siyasətini və insanlığa qarşı hərbi cinayətlərini davam etdirərək Gəncə, Bərdə, Tərtər və Azərbaycanın digər şəhər və yaşayış məntəqələrində dinc əhaliyə qarşı terrorunu, işğal olunmuş ərazilərimizdə erməni ekstremistləri tərəfindən yüzlərlə məscid, məbəd və kilsələrin, minlərlə məzarlıqların dağıdılması, ümumislam əhəmiyyətli irs nümunələrinin mənşəyinin saxtalaşdırılması və dini məbədlərin qriqoryanlaşdırılması, hətta, əsarətdə qalan məscidlərimizin tövləyə çevrilərək, İslamda haram buyurulan heyvanların saxlanılması kimi vandal həqarət əməlləri törədiblər. Erməni kilsəsinin bu işğalçılıq və vandalizm əməllərinə dəstək verərək Azərbaycanın işğal olunmuş ərazilərində ölənədək vuruşmağa çağırışlarını sülhə deyil, ölümə, işğala, təcavüzə xeyir-dua verməsini dini mərkəzə yaraşmayan və xristianlığın hökmlərinə zidd olan nifrətə çağırış nümunəsidir.”

 

Allahşükür Paşazadə bütün İslam ölkələrinə müraciət edərək Ermənistana Azərbaycana qarşı işğalçılıq siyasətinə dəstək ola biləcək hər hansı siyasi, mənəvi, iqtisadi, hərbi yardımlar göstərməməyə, o cümlədən, öz ərazilərindən həmin məqsədlə təyinatlı daşınmalara və muzdluların hərəkətinə yol verməməyə çağırıb. Qarabağın qədim şəhəri Şuşada Azərbaycanın üçrəngli dövlət bayrağının dalğalanmasını və Azan səsinin ucalmasını böyük nemət kimi dəyərləndirib, Azərbaycan xalqını təbrik edib.

 

QMİ sədri bütün ermənilərin katalikosu II Qareginin ikinci Qarabağ müharibəsi zaman bütün ermənilərə müraciət edərək onları müharibəyə səsləməsinin, Ermənistanın işğalına dəstək verməsinin dini baxımdan qəbuledilməz olduğunu da qeyd edib.

 

Dini Qurumlarla İş üzrə Dövlət Komitəsinin sədri Mübariz Qurbanlı  isə bildirib ki, Ali Baş Komandan İlham Əliyevin rəhbərliyi ilə Azərbaycan Ordusu 30 ildir işğal altında olan Dağlıq Qarabağı işğaldan azad edib. Bu günü hər bir bölgədə, dünyada harada olmasından asılı olmayaraq hər bir azərbaycanlı bayram kimi qeyd edir: "İslam Əməkdaşlıq Təşkilatı 51 ildir mövcuddur, onlar islam dünyasını birləşdirmək üçün çox böyük işlər görüb. İƏT Ermənistanın Azərbaycana təcavüzü məsələsində hər zaman yanımızda olub. İƏT-in Azərbaycanın ərazi bütövlüyü ilə bağlı qəbul etdiyi qərar və qətnamələr hüquqi baza rolunu oynayıb. İƏT sonuncu mücadiləmizdə də dəstəyini əsirgəmədi, eyni zamanda, Türkiyə, Pakistan, İranın dəstəyini qeyd etmək istəyirəm. Ümumilikdə bütün islam ölkələri bizə dəstək göstərib. 30 il torpaqlarımızı sülh yolu ilə azad etməyə çalışdıq. Amma Ermənistan bu çağırışlara əməl etmədi, nəticədə onun üçün acınacaqlı oldu".

 

Daha sonra konfransda İslam Əməkdaşlıq Təşkilatının Baş katibi Yusif bin Əhməd Əl-Useymin xüsusi nümayəndəsi, İslam aləminin, o cümlədən Yaxın Şərq, Afrika, Avropa və Asiyanın nüfuzlu siyasi-ictimai xadimləri və din rəhbərləri çıxış ediblər.