Axşam saatlarında sərxoş halda avtoxuliqanlıq edən sürücü saxlanılıb.

APA TV-nin cənub bürosunun verdiyi xəbərə görə, Lənkəran Şəhər Rayon Polis Şöbəsinin Dövlət Yol Polisi Bölməsinin əməkdaşları axşam saatlarında Lənkəran rayonunun Liman şəhəri ərazisində xidmət apararkən “Opel Astra” markalı avtomobilin sürücüsü tərəfindən yol hərəkət qaydalarının pozulduğu müəyyən edilib. Həmin şəxs polisin qanuni tələblərinə məhəl qoymayaraq təhlükəli manevrlər etməklə ərazidən uzaqlaşmağa çalışıb. Saxlanıldıqdan sonra həmin nəqliyyat vasitəsinin sürücüsü Liman şəhər sakini Murad Muradovun sərxoş olduğu müəyyən edilib.

 Murad Muradov tutduğu hərəkətdən peşman olduğunu bildirirb: “Özüm azca içki qəbul etdiyim üçün maşını saxlamadım. Təhlükəli manevrlər yaradıb aradan çıxmağa çalışdım. Polis əməkdaşları məni saxlayıb. Gətirdilər şöbəyə.”

Həmin şəxs barəsində inzibati qaydada protokol tərtib olunaraq hüquqi qiymət verilməsi üçün Lənkəran Rayon Məhkəməsinə göndərilib.

Tural Kərimov, Rövşən Əzimov, APA TV, Lənkəran.