Sumqayıtın mərkəzi küçələrindən birinə Azərbaycanın Milli Qəhrəmanı, general-mayor Polad Həşimovun adı verilib.

 

Sumqayıt şəhər İcra Hakimiyyətindən APA TV-yə verilən məlumata görə, bununla bağlı icra başçısı Zakir Fərəcov müvafiq sərəncam imzalayıb. 

 

Artıq sözügedən küçəyə ünvan lövhələri də vurulub.

 

Xatırladaq ki, həmin küçənin əvvəlki adı Məşədi Əzizbəyov olub.

 

P.Həşimov Qəbələ rayonunun Vəndam kəndində anadan olub. Ailələri ilə birgə Sumqayıt şəhərinə köçdüyündən, burada 28 və 34 nömrəli məktəblərdə orta təhsil alıb. Heydər Əliyev adına Azərbaycan Ali Hərbi Məktəbini bitirən Polad Həşimov taqım komandirliyindən “general-mayor” ali hərbi rütbəsinədək yüksəlib. O, 14 iyul 2020-ci ildə Ermənistan-Azərbaycan sərhədinin Tovuz rayonu istiqamətində düşmən təxribatlarının qarşısını alarkən qəhrəmancasına şəhid olub. Azərbaycan Prezidentinin 9 dekabr 2020-ci il tarixli sərəncamı ilə ölümündən sonra “Azərbaycanın Milli Qəhrəmanı” fəxri adına layiq görülüb.