18:33 28 noyabr 2022 181
Ana səhifə Xəbərlər

Turan qətlindən bir neçə dəqiqə əvvəl qalib gəlibmiş...

Noyabrın 26-da Şağan qəsəbəsində yerləşən Olimpiya İdman Kompleksində qətl törədən 2002-ci il təvəllüdlü Ruslan Səfixanov barəsində məhkəmənin qərarı ilə həbs qətimkan tədbiri seçilib.

 

Bu barədə “Qafqazinfo” məlumat yayıb. Bildirilir ki, Yevlax rayon sakini 2006-cı il təvəllüdlü Turan Rüstəmovu yarış vaxtı tribunada bıçaqlayaraq öldürən Ruslan Səfixanovun atası, əməkdar məşqçi Elçin Səfixanov Daxili İşlər Nazirliyinin "Dinamo" İdman Cəmiyyətində çalışır. O, mülki işçi kimi həmin cəmiyyətdə fəaliyyət göstərir.

 

Məlumata görə, hadisədən əvvəl Turan Rüstəmov tatamiyə çıxıb və görüşünü qələbə ilə başa çatdırıb. Bundan sonra Ruslan Səfixanovun təmsil etdiyi komandanın idmançıları ilə onun arasında mübahisə baş verib. Bir qədər keçdikdən sonra isə belinə bıçaq qoymuş Ruslan Turanın oturduğu yerə yaxınlaşıb və ona zərbələr endirib. Çoxsaylı bıçaq xəsarətləri alan Turan Rüstəmov vəfat edib. O, ötən gün Yevlax rayonunda dəfn edilib.

 

Qeyd edək ki, hadisə “Arifoğlu” cüdo klubunun təşkil etdiyi yarış zamanı baş verib. 

 

Baş verən qətl sosial şəbəkələrdə ciddi müzakirələrə yol açıb. Qeyd edilib ki, bu hadisə bir neçə dəqiqənin içində yaranmış mübahisənin nəticəsinə oxşamır. Müzakirələrə qoşulan hüquqşünaslar bildiriblər ki, Cinayət Məcəlləsinin 120-ci maddəsi (Qəsdən adam öldürmə) ilə təqsirləndirilən şəxsin maddəsinin 120.2.2-ciyə (Xuliqanlıq niyyətilə adam öldürmə) dəyişdirilməsi istisna edilmir. Belə ki, hadisədə ağırlaşdırıcı hallar var. Bu maddə üzrə təqsirləndirilən şəxsi 14 ildən 20 ilədək həbs cəzası gözləyir.

Müəllif | Apa.Tv

Apa.tv

Kodu kopyalayın