Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ("ASAN Xidmət") Əmək Münasibətlərinin Monitorinqi Mərkəzi tərəfindən 526 tikinti obyektində yoxlamalar aparılıb. Nəticədə 43 qayda pozuntusu aşkarlanıb.

 

APA TV-nin xəbərinə görə, bunu Agentlik sədri Ülvi Mehdiyev ötən ilin yekunlarına həsr olunan mətbuat konfransında bildirib.

 

Onun sözlərinə görə, qayda pozuntusu edən 47 şirkət 454 min manat məbləğində cərimələnib:  “İndiyə kimi tikinti obyektlərində əmək münasibətlərinin tənzimlənməsi ilə bağlı 171 səyyar monitorinq həyata keçirilib. Bunlardan 67-si 2019-cu ildə baş tutub. Eyni zamanda monitorinq edilmiş işçilərin sayı 6666 olub ki, onlardan da 2661-i 2019-cu ildə olub. Bununla yanaşı, monitorinq edilmiş işəgötürənlərin sayı 318 olub ki, onlardan da 116-sı 2019-cu ildə edilib”.

 

2019-cu il ərzində “ASAN Xidmət”ə 9 milyondan çox müraciətin daxil olduğunu deyən Ülvi Mehdiyev onu da bildirib ki, “ASAN Xidmət”ə fəaliyyət göstərdiyi 7 il ərzində 6 500 000-dən çox vətəndaş tərəfindən 35 410 334 müraciət daxil olub. Bu isə hər vətəndaşın ən azı 5 dəfə "ASAN Xidmət"ə müraciət etməsi deməkdir.

 

Agentlik sədri müraciətlərin ən çox şəxsiyyət vəsiqəsinin alınması ilə bağlı olduğunu deyib: “Bir gün ərzində "ASAN Xidmət"də 3718 nəfərə şəxsiyyət vəsiqəsi verilir. Eyni zamanda bir gün ərzində "ASAN Xidmət"də 408 nikah qeydə alınır. 2019-cu il ərzində 920 000-dən çox “ASAN Viza” verilib”.

 

2020-ci ildə 6 "ASAN Xidmət" və bir "ASAN Kommunal" mərkəzinin açılmasının gözlənildiyini deyən sədr yeni mərkəzlərin Tovuz, Balakən, Kürdəmir, Ağcabədi rayonlarında, eyni zamanda əlavə olaraq Bakı və Sumqayıtda açılacağını bildirib.