Vətən müharibəsində qazi olan döyüşçünün azyaşlı övladı ağır xəstəlikdən əziyyət çəkir.

APA TV-nin şimal bürosunun verdiyi məlumata görə, 4 yaşlı Amid  Hacımuradovda doğulduqdan bir neçə ay sonra serebral iflic xəstəliyinin olduğu müəyyənləşib.

Nənəsi Məlahət Şahverdiyeva deyir ki, 2 yaşında komaya düşən azyaşlı görmə qabiliyyətini də itirib. Onun atası 6 ildir ki, Azərbaycan Ordusunda xidmət edir. O, 44 gün davam edən Vətən müharibəsində Füzuli rayonu uğrunda gedən döyüşlərdə yaralanıb, hazırda müalicəsi davam etdirilir: “Amidimin 4 yaşı var, o danışmır, oturmur, qida qəbul edə bilmir. Ən əzablısı dünya işığından məhrumdur. Atası Famil Hacımuradov hərbçidir. Füzuli uğrunda gedən döyüşlərdə yaralanıb, hazıra xəstəxanada yatır. Əlacsız qalıb, balaca Amid üçün Azərbaycan xalqından kömək istəyirəm. Onun həmyaşıdları gələn ildən məktəbə gedəcək, o isə kürək üstə qalıb. Heç bir hissiyyatı yoxdur, illərlə əziyyətini çəkən anasını belə tanımır. Amid üçün Azərbaycanın mərd, dəyərli insanlarından yardım istəyirəm. Mənim Amidimə kömək eləsinlər. Atası hərbçi olduğuna baxmayaraq, övladı üçün çox əziyyət çəkib. Hazırda onların maddi vəziyyətləri də çox ağır vəziyyətdədir. Familin banklara 20 min manatdan çox borcu var. Uşaqları yerisin deyə, normal uşaqlar arasına çıxsın deyə onun valideynləri çox əzab çəkir”.

Ailəsi deyir ki, hazırda 4 yaşlı Amidi müalicə etmək üçün maddi imkanları yoxdur. Onların sözlərinə görə, uşağın müalicəsi üçün banklara 20 min manata qədər borcları yaranıb.

Ailə 4 yaşlı Amidin müalicəsi üçün yardım istəyir. 

+994 70 931 19 90