Əfsanədən gerçəkliyə: bir gülün sehrində - Vətən Müharibəsinə həsr olunan yeni klip hazırlanıb
Vətən müharibəsinə həsr olunan yeni klip hazırlanıb. Sözləri Leyla Əliyevaya, musiqisi Kamala məxsus “Xarıbülbül” mahnısına klip çəkilib.
APA TV-nin xəbərinə görə, sözləri Heydər Əliyev Fondunun vitse-prezidenti Leyla Əliyevaya aid olan “Xarıbülbül” adlı mahnı illərlə intizarını çəkdiyimiz torpaqların azad olunmasına həsr olunub.
Müğənni Aydın Sani, əməkdar artist Təyyar Bayramov və oğlu Kənan Bayramovun ifasını aranjimançı Mahir İbrahimov ərsəyə gətirib.
Oğuz alpaqutunun qanlı köynəyini cırıb bülbüllə sevgilisi Aybükəyə göndərməsi, gülün görüşünə tələsən bülbülü küləyin ayırması, Ağabəyim xatunun Vətən həsrəti... Bütün bu əfsanələrin motivində intizar, ayrılıq önə çəkilsə də, detallarda qovuşma var.
Əfsanələr sehrlidir. Oradakı obrazlardan hansınınsa yuxusu, ilğımı, mübarizəsi və xoş gerçəkliyi olur. “Xarıbülbül” klipində də ilğımla xatirələrin, yuxu ilə gerçəkliyin sintezi var.
Bu klip 28 illik həsrətin sonu - Vətən Müharibəsindəki qələbəmizə, bu qələbəni bizə qazandıran şəhidlərimizə, döyüşçülərimizə ithaf olunur.
söz:Leyla Əliyeva
musiqi:Kamal
ifaçılar:Aydın Sani
Təyyar Bayramov
Kənan Bayramov
Layihə rəhbəri: Orxan Məmmədli
Rəssam: Lalə Hüseynzadə
Qrafika: Vüsal İmanov
Montaj rejissoru: Zaur Hüseyn
Montaj: Cəbrayıl Əmirov
Ay bülbül sevdalı sehrli çiçək
Bu doğma, bu əziz dağlara bəzək
Nə vaxtdır biz səndən ayrı düşmüşük
Gəl indi qol-qola cənnəti gəzək
Hüsnünə sözümün qüdrəti çatmaz
Tanrının səbri var, haqqı unutmaz
Bu vətən bağında ay xarı bülbül
Mən səni aradım hər gələndə yaz
Qəlbimiz ağladı, lal oldu dillər
Sənsiz aylar keçdi, ötüşdü illər
Yaşadın bu xalqın dualarında
Səni unutmadı gələn nəsillər
Dindin muğamımda, neyim-tarımda
ətrini aradım qoxularımda
qəlbimdə gül açdın, ay xarı bülbül
oxudun hər gecə yuxularımda
yenə də, çox şükür böyük Allaha
dözmədi dağ-daşı yandıran aha
bizi qovuşdurdu, ay xarı bülbül
bir də ayrılmayaq səninlə daha!
APA TV-nin hazırladığı klipi təqdim edirik.
