Dünyanın bu günü - 14.05.2021

MARK ZUKERBERQ

(1984)

 

“Facebook” sosial şəbəkəsinin qurucusu, amerikalı sahibkar Mark Elliot Zukerberq 14 may 1984-cü ildə Nyu-Yorkda doğulub. Atası Edvard diş həkimi, anası Karen psixiatr olub. Milliyyətcə yəhudidir. ABŞ-ın ən nüfuzlu ali məktəblərindən biri olan Harvard Universitetinə daxil olub. Universitetdə oxuduğu illərdə www.facemash.com saytını düzəldib. Saytda Harvard Universitetinin bütün tələbələrinin şəkilləri vardı. Ancaq fotoşəkilləri tapmaq üçün universitetin məlumat bölməsinə girmək lazım idi. Məlumat bölməsinə icazəsiz daxil olduğu üçün cəzalandırılan gələcək milyarder təhsilini yarımçıq qoyaraq Harvard Universitetini tərk edib. Bundan sonra Harvard tələbələrini internet üzərindən görüşdürmək üçün ikinci saytı olan “Facebook”u yaradıb. 2011-ci ildə “Facebook” dünyanın ən dəyərli 500 markası arasında 281-ci olub. 2010-cu ildə “Time” jurnalı Mark Zukerberqi ilin adamı seçib. O, daltonikdir, yaşıl və qırmızı rəngləri seçə bilmir. Amma göy rəngi çox yaxşı görür. Ona görə də “Facebook”da göy rəng üstünlük təşkil edir. “Bloomberg” agentliyinə və “Forbes” jurnalına görə, Mark Zukerberq dünyanın ən varlı beş adamından biridir.


 

MÜQƏDDƏS QƏDİROV

(1992-2020)

 

Şəhid Müqəddəs Nail oğlu Qədirov 1992-ci il mayın 14-də Xaçmaz rayonunun Dədəli kəndində anadan olub. Həqiqi hərbi xidmətini başa vurduqdan sonra müddətdən artıq xidmət edən hərbi qulluqçu kimi yenidən ordu sıralarına qayıdıb. 2020-ci il sentyabrın 27-də başlayan Vətən Müharibəsində iştirak edib. Əsgər Müqəddəs Qədirov oktyabrın 5-də Füzuli istiqamətində gedən döyüşlərdə şəhid olub və doğulduğu kənddə dəfn edilib. Ölümündən sonra "Vətən uğrunda" medalı ilə təltif olunub.

 

 

RÖYAL MƏDƏTOV

(1992-2020)

 

Şəhid Röyal Şahin oğlu Mədətov 1992-ci ilin bu günü Qazax rayonunun Hüseynbəyli kəndində anadan olub. Həqiqi hərbi xidmətini başa vurduqdan sonra müddətdən artıq xidmət edən hərbi qulluqçu kimi yenidən ordu sıralarına qayıdıb. 2016-cı ilin Aprel döyüşlərində və 2020-ci il sentyabrın 27-də başlayan Vətən Müharibəsində iştirak edib. Kiçik gizir Röyal Mədətov oktyabrın 22-də Qubadlı döyüşləri zamanı şəhid olub və doğulduğu kənddə dəfn edilib. Ölümündən sonra "Vətən uğrunda" və "Şuşanın azad olunmasına görə" medalları ilə təltif edilib.

 

 

RƏHMAN ƏJDƏROV

(1997-2020)

 

Şəhid Rəhman Rasim oğlu Əjdərov 14 may 1997-ci ildə Babək rayonunun Kalbaoruc Dizə kəndində anadan olub. Heydər Əliyev adına Azərbaycan Ali Hərbi Məktəbində təhsil alıb. 2020-ci il sentyabrın 27-də  başlayan Vətən Müharibəsində iştirak edib. Leytenant Rəhman Əjdərov noyabrın 9-da Şuşa döyüşləri zamanı şəhid olub. Ölümündən sonra "Azərbaycan Bayrağı" ordeni, "Vətən uğrunda", "Xocavəndin azad olunmasına görə" və "Laçının azad olunmasına görə" medalları ilə təltif edilib.

 

 

ROMİR ƏLİYEV

(1997-2020)

 

Şəhid Romir Rəşadət oğlu Əliyev 1997-ci il mayın 14-də Lənkəran rayonunun Aşağı Nüvədi kəndində anadan olub. Orta məktəbi bitirdikdən sonra 2015-ci ildə hərbi xidmətə yollanıb. 27 sentyabr 2020-ci ildə başlayan Vətən Müharibəsində  könüllü olaraq iştirak edib. Əsgər Romir Əliyev 21 oktyabr 2020-ci ildə Qubadlı uğrunda gedən döyüşlərdə şəhid olub. Ölümündən sonra "Vətən uğrunda" medalı ilə təltif edilib.

 

 

MÜNASİB YUSİFOV

(2000-2020)

 

Şəhid Münasib Mübariz oğlu Yusifov 2000-ci ilin bu günü Tovuz rayonunun Yuxarı Öysüzlü kəndində anadan olub. 2018-2019-cu illərdə həqiqi hərbi xidmətdə olub. 2019-cu ildə müddətdən artıq xidmət edən hərbi qulluqçu kimi yenidən ordu sıralarına qayıdıb. 2020-ci il sentyabrın 27-də başlayan Vətən Müharibəsində tankçı kimi iştirak edib. Əsgər Münasib Yusifov noyabrın 6-da Şuşa uğrunda gedən döyüşlərdə şəhid olub. Ölümündən sonra "Vətən uğrunda" və "Qubadlının azad olunmasına görə" medalları ilə təltif edilib.

 

 

BƏHRAM MANSUROV

(1911-1985)

 

Azərbaycan xalq artisti, tarzən Bəhram Məşədi Süleyman bəy oğlu Mansurovun anım günüdür. O, 1911-ci il fevralın 12-də İçərişəhərdə musiqiçi ailəsində anadan olub. İlk təhsilini mədrəsədə, sonra rus-tatar məktəbində alıb, oxuduğu son təhsil ocağı isə Pedaqoji Texnikum olub. Tar çalmaq sənətini atasından və əmisi Mansur Mansurovdan öyrənib. 1929-cu ildən Azərbaycan Dövlət Şərq Orkestrində, sonralar Azərbaycan Televiziya və Radiosunun Xalq Çalğı Alətləri Orkestrində fəaliyyət göstərib və Azərbaycan Dövlət Filarmoniyasının solisti olub. 1932-ci ildən Azərbaycan Dövlət Opera və Balet Teatrının solisti və konsertmeysteri kimi uzun illər muğam operalarını tarda müşayiət edib. Onun ifasında “Çahargah” və “Rast” muğamları nota salınıb. 1941-ci ildən Azərbaycan Dövlət Musiqi Məktəbində pedaqoji fəaliyyət göstərib, bir çox tarzənlərin ustadı olub. Bəhram Mansurov 1985-ci il mayın 14-də Bakıda dünyasını dəyişib. Xalq artisti Eldar Mansurovun, tarzən Elxan Mansurovun və kinooperator Aydın Mansurovun atasıdır.

 

 

ŞAMİL ƏZİZBƏYOV

(1906-1976)

 

Azərbaycanın əməkdar elm xadimi, geologiya-mineralogiya elmləri doktoru, akademik Şamil Əzizbəyovun xatirə günüdür. O, 1906-cı il fevralın 14-də Aşqabadda dünyaya gəlib. 1930-cu ildə Azərbaycan Politexnik İnstitutunu mühəndis-geoloq ixtisası üzrə bitirib. Zaqafqaziya geoloji trestində və nadir metal kəşfiyyatı partiyalarında, 1932-ci ildən isə Azərbaycan Sənaye İnstitutunun petroqrafiya kafedrasında işləyib. 1938-1941-ci illərdə Azərbaycan EA Geologiya İnstitutunda petroqrafiya şöbəsinə rəhbərlik edib və İnstitutun direktor müavini vəzifəsində çalışıb. SSRİ EA-nın Azərbaycan filialının Rəyasət Heyətinin sədr müavini, Azərbaycan KP MK-nın neft üzrə katibinin müavini olub. 1945-ci ildə Azərbaycan EA-nın təşkil edənlərdən biri olub, Akademiyanın həqiqi üzvü və vitse-prezidenti seçilib. 500-dən çox elmi əsərin, o cümlədən 8 monoqrafiyanın müəllifidir, bir sıra orden və medallarla təltif edilib. Şamil Əzizbəyov 1976-cı ilin 14 mayında dünyasını dəyişib və Fəxri Xiyabanda dəfn olunub.

 

 

QASIM RZAYEV

(1970-1992)

Bu gün Azərbaycanın Milli Qəhrəmanı Qasım Qara oğlu Rzayevin anım günüdür. O, 5 may 1970-ci ildə Tovuz rayonunun Əlibəyli kəndində dünyaya gəlib. 1988-1990-cı illərdə Ukraynada artilleriya hissəsində hərbi xidmətdə olub. Vətənə qayıtdıqdan sonra könüllü özünümüdafiə batalyonlarından birinə yazılıb. Muncuqlu, Ağdam və Hacallı kəndlərinin müdafiəsində vuruşub. 14 may 1992-ci ildə ermənilərin ağır texnikalarla Tovuz rayonunun sərhədyanı bölgələrinə hücumunun qarşısını alarkən qəhrəmancasına həlak olub. Azərbaycan Prezidentinin 5 fevral 1993-cü il tarixli fərmanı ilə Qasım Rzayevə ölümündən sonra "Azərbaycanın Milli Qəhrəmanı" adı verilib.

Müəllif | Apa.Tv
Apa.tv