00:01 27 iyun 2021 1323
Ana səhifə Dünyanın bu günü

Dünyanın bu günü - 27.06.2021

NATİQ SƏFƏROV

(1943-2004)

 

"Qızıl Qələm" mükafatı laureatı, tərcüməçi Natiq Əli oğlu Səfərov 1943-cü il iyunun 27-də Naxçıvan şəhərində ziyalı ailəsində anadan olub. Azərbaycan Dövlət Universitetinin Filologiya fakültəsini bitirib. Əmək fəaliyyətinə 1966-cı ildə Azərbaycan Dövlət Televiziya və Radio Verilişləri Komitəsində texnik kimi başlayıb, burada kiçik redaktor və redaktor işləyib. Daha sonra "Azərbaycan" jurnalında ədəbi işçi, böyük redaktor, Azərbaycan Dövlət Televiziya və Radio Verilişləri Komitəsində ştatdankənar müxbir olub. "Yazıçı" nəşriyyatında bədii tərcümə şöbəsinin böyük redaktoru, Azərbaycan Bədii Tərcümə və Ədəbi Əlaqələr Mərkəzində şöbə müdiri, sədr müavini, 1989-1991-ci illərdə "Qanun" jurnalının baş redaktoru vəzifələrində çalışıb. Dünya ədəbiyyatından etdiyi peşəkar tərcümələri oxucular tərəfindən rəğbətlə qarşılanıb. Natiq Səfərov 2004-cü il sentyabrın 26-da Bakıda dünyasını dəyişib.

 

 

YAVƏR ƏLİYEV

(1956-1992)

 

27 iyun eyni zamanda Azərbaycanın Milli Qəhrəmanı Yavər Yaqub oğlu Əliyevin doğum günüdür. O, 1956-cı ildə Bakı şəhərində dünyaya gəlib. Pirallahı adasında 235 saylı tam orta məktəbi bitirdikdən sonra Kremençuq Aviasiya Məktəbinə daxil olub. Tükənməz səyi və zəhməti sayəsində müxtəlif tipli vertolyotların idarə olunmasını dərindən öyrənib. Azərbaycan Hərbi Hava Qüvvələrinin yaranmasında böyük əməyi olub. Bir neçə dəfə Qarabağa Mi-24 vertolyotundan düşmən mövqelərinə ağır zərbələr endirib. 1992-ci il fevralın 29-da vertolyotunun ermənilər tərəfindən vurulması nəticəsində həlak olub və Bakı şəhərinin Şəhidlər Xiyabanında dəfn edilib. Azərbaycan Prezidentinin 14 sentyabr 1992-ci il tarixli fərmanı ilə Yavər Əliyev ölümündən sonra "Azərbaycanın Milli Qəhrəmanı" adına layiq görülüb.

 

 

MALİK ƏSƏDOV

(1962-1992)

 

Azərbaycanın Milli Qəhrəmanı Malik Hamil oğlu Əsədov 27 iyun 1962-ci ildə Yevlax rayonunun Havarlı kəndində doğulub. 1979-cu ildə orta məktəbi bitirdikdən sonra Qazaxıstanda hərbi xidmətdə olub. Qarabağ müharibəsinin başlanğıcında Xocalı, Əsgəran, Ağdam və Şuşa cəbhələrində döyüşüb. 1992-ci il yanvarın 18-də ermənilərin Şuşanın Nəbilər kəndinə hücumunu dəf edərkən qəhrəmancasına həlak olub və doğulduğu kənddə dəfn edilib. Azərbaycan Prezidentinin 8 oktyabr 1992-ci il tarixli fərmanı ilə Malik Əsədov ölümündən sonra "Azərbaycanın Milli Qəhrəmanı" adı ilə təltif olunub.

 

 

RUSLAN MURADOV

(1973-1992)

 

Azərbaycanın Milli Qəhrəmanı Ruslan Həmid oğlu Muradov 1973-cü ilin bu günü Mingəçevir şəhərində dünyaya göz açıb. 1990-cı ildə burada 10 saylı məktəbi bitirdikdən sonra Mingəçevir Texniki Rezin Məmulatı zavodunda çalışıb. 1992-ci il 22 yanvar tarixdə Milli Ordu sıralarına daxil olub. Bir müddət hazırlıq keçdikdən sonra Ağdamın Papravənd kəndinə göndərilib və burada qızğın döyüşlərə qatılaraq kəndin erməni işğalçılarından azad edilməsində rol oynayıb. 1992-ci ildə Azərbaycana məxsus təyyarələrdən biri düşmən əlində olan əraziyə düşdüyündən, yaralıları xilas etmək üçün aparılan əməliyyatda xüsusilə fərqlənib. Ruslan Muradov 1992-ci il 22 avqust Ağdam rayonunun Papravənd kəndi uğrunda gedən döyüşlərdə qəhrəmancasına həlak olub. Azərbaycan Prezidentinin 6 noyabr 1992-ci il tarixli 290 saylı fərmanı ilə ölümündən sonra ona "Azərbaycanın Milli Qəhrəmanı" adı verilib. Mingəçevir şəhərinin Şəhidlər Xiyabanında dəfn edilib. Bu şəhərdəki Texniki Humanitar Lisey qəhrəmanımızın adını daşıyır, burada büstü qoyulub.

 

 

MƏHƏMMƏD VƏLİYEV

(1996-2020)

 

Şəhid Məhəmməd Nail oğlu Vəliyev 1996-cı il iyunun 27-də Masallı rayonunun İmanlı kəndində anadan olub. Binə Xocavar kənd tam orta məktəbində təhsil alıb. 2014-cü ildə həqiqi hərbi xidmətə yollanıb. 2016-cı ilin aprel döyüşlərində və 27 sentyabr 2020-ci ildə başlayan Vətən Müharibəsində iştirak edib. Əsgər Məhəmməd Vəliyev oktyabrın 23-də Füzuli döyüşləri zamanı şəhid olub və Masallı rayonunun Çaxırlı kəndində dəfn edilib. Ölümündən sonra "Vətən uğrunda", "Cəsur döyüşçü", "Cəbrayılın azad olunmasına görə" və "Qubadlının azad olunmasına görə" medalları ilə təltif olunub.

 

 

FƏQAN MƏMMƏDOV

(1998-2020)

 

Şəhid Fəqan Vahid oğlu Məmmədov 27 iyun 1998-ci ildə Zaqatala rayonunun Yeni Suvagil kəndində anadan olub. Azərbaycan Dövlət Mədəniyyət və İncəsənət Universitetinin Kinorejissorluq fakültəsində təhsil alıb.  2020-ci ildə həqiqi hərbi xidmətə çağırılıb. Sentyabrın 27-də başlayan Vətən Müharibəsində iştirak edib. Əsgər Fəqan Məmmədov oktyabrın 6-da Ağdam döyüşləri zamanı şəhid olub və doğulduğu kənddə torpağa tapşırılıb. Ölümündən sonra "Vətən uğrunda" və "Ağdamın azad olunmasına görə" medalları ilə təltif olunub.

 

 

SABİR HEYDƏROV

(1998-2020)

 

Şəhid Sabir Ceyhun oğlu Heydərov 1998-ci ilin bu günü Şamaxı rayonunun Şərədil kəndində anadan olub. 2016-2017-ci illərdə həqiqi hərbi xidmətdə olub. 2018-ci ildə müddətdən artıq xidmət edən hərbi qulluqçu kimi yenidən ordu sıralarına qayıdıb. 2020-ci il sentyabrın 27-də başlayan Vətən Müharibəsində iştirak edib. Kiçik gizir Sabir Heydərov oktyabrın 3-də Füzuli döyüşləri zamanı şəhid olub və Şamaxı Şəhidlər Xiyabanında dəfn edilib. Ölümündən sonra "Vətən uğrunda", "Hərbi xidmətlərə görə", "Cəbrayılın azad olunmasına görə" və "Kəlbəcərin azad olunmasına görə" medalları ilə təltif olunub.

 

 

CƏSARƏT SƏFƏROV

(2001-2020)

 

Şəhid Cəsarət Xaliq oğlu Səfərov 2001-ci il iyunun 27-də Suraxanı rayonunda anadan olub. Lənkəran Dövlət Universitetində təhsil alıb. 2019-cu ildə həqiqi hərbi xidmətə çağırılıb. 2020-ci il sentyabrın 27-də başlayan Vətən Müharibəsində iştirak edib. Əsgər Cəsarət Səfərov noyabrın 4-də Laçın döyüşləri zamanı şəhid olub. 43 gün sonra tapılan nəşi II Fəxri Xiyabanda dəfn edilib. Ölümündən sonra "Vətən uğrunda", "Laçının azad olunmasına görə", "Cəbrayılın azad olunmasına görə" və "Qubadlının azad olunmasına görə" medalları ilə təltif olunub.

 

 

 

RAMEŞ ZƏKİYEV

(2001-2020)

 

Şəhid Rameş Gülverdi oğlu Zəkiyev 27 iyun 2001-ci ildə Astara rayonunun Şahağac kəndində anadan olub. 2019-cu ildə həqiqi hərbi xidmətə yollanıb. 2020-ci il sentyabrın 27-də başlayan Vətən Müharibəsində iştirak edib. Əsgər Rameş Zəkiyev oktyabrın 15-də şəhid olub. Ölümündən sonra "Vətən uğrunda" və "Ağdamın azad olunmasına görə" medalları ilə təltif olunub.

 

KÖVKƏB SƏFƏRƏLİYEVA

(1907-1985)

 

Azərbaycanın ilk pianoçu-pedaqoqu, xalq artisti, professor Kövkəb Kamil qızı Səfərəliyevanın anım günüdür. O, 1907-ci il yanvarın 3-də Bakı şəhərində anadan olub. 1915-ci ildə Kövkəb Marinski adına ümumtəhsil məktəbinə daxil olub. 1916-cı ildə təhsilini musiqi texnikumunda davam etdirib. 1926-cı ildə dəvət edildiyi Türk Qadın Seminariyasında pedaqoji fəaliyyətinə başlayıb. Məhz bu seminariyada dahi bəstəkar Üzeyir Hacıbəyovla tanışlığı və birgə fəaliyyəti başlayıb. 1932-ci ildə Azərbaycan Dövlət Konservatoriyasının fortepiano şöbəsini bitirib. 1937-ci ildə Konservatoriyanın nəzdində orta ixtisas musiqi məktəbini yaradıb və 1937-1952-ci illərdə onun direktoru olub. Bir sıra elmi-metodik dərsliklərin, fortepiano üçün külliyyatın tərtibçisi və musiqi haqqında məqalələrin müəllifidir. Bəstəkar Asəf Zeynallı ilə evli olan Kövkəb Səfərəliyeva 1985-ci ildə Bakıda dünyasını dəyişib. Bakı şəhərindəki 16 saylı Uşaq Musiqi Məktəbi onun adını daşıyır.

 

 

TAĞI TAĞIYEV

(1917-1993)

 

Azərbaycanın xalq rəssamı Tağı Əzizağa oğlu Tağıyevin anım günüdür. O, 1917-ci il noyabrın 7-də Bakıda dünyaya gəlib. 1931-1935-ci illərdə Azərbaycan Dövlət Rəssamlıq Texnikumunda, 1940-1941-ci illərdə Moskva Rəssamlıq İnstitutunda təhsil alıb. Azərbaycanda realist boyakarlığının yaradıcılarından olub. Əsasən tematik tablolar, natürmort, portret, mənzərə və məişət səhnələrinin müəllifi olub. Əsərləri Moskvada Şərq Xalqları İncəsənəti Muzeyində, Rüstəm Mustafayev adına Azərbaycan Milli İncəsənət Muzeyində, Azərbaycan Dövlət Rəsm Qalereyasında və digər muzeylərdə saxlanılır. Tağı Tağıyev 27 iyun 1993-cü ildə Bakı şəhərində vəfat edib.

 

 

SƏYAVUŞ ASLAN

(1935-2013)

 

Azərbaycanın xalq artisti, görkəmli teatr və kino aktyoru Səyavuş Məmmədağa oğlu Aslan da bu gün xatırlanır. O, 1935-ci il sentyabr ayının 5-də Bakıda doğulub. 1947-1953-cü illərdə müxtəlif dram dərnəklərində çıxış edib. 1954-cü ildə Musiqili Komediya Estrada Truppasında, 1958-ci ildə Quba Dövlət Dram Teatrında işləyib. 1959-cu ildə Bakıya qayıdıb və Azərbaycan Dövlət Musiqili Komediya Teatrında işə qəbul olunub. 1994-1996-cı illərdə uzun illər çalışdığı bu teatrın bədii rəhbəri işləyib. 1984-cü ildən Akademik Milli Dram Teatrında fəaliyyət göstərib. Bir sıra filmlərdə yaddaqalan obrazlar yaradıb. Azərbaycan Prezidentinin fərdi təqaüdçüsü olub, "Şöhrət" və "Şərəf" ordenləri ilə təltif olunub. Aktrisa Ofeliya Aslanla evli olan Səyavuş Aslan uzun sürən xəstəlikdən sonra 27 iyun 2013-cü ildə Bakıda vəfat edib və II Fəxri Xiyabanda dəfn olunub.

 

 

SƏXAVƏT MƏHƏRRƏMOV

(1973-1992)

 

Azərbaycanın Milli Qəhrəmanı Səxavət Ələmdər oğlu Məhərrəmovun xatirə günüdür. O, 5 dekabr 1973-cü ildə Qərbi Azərbaycanın Şörəyel mahalında, Amasya rayonunun Qaraçanta kəndində anadan olub. 1988-ci ildə ailəsi ilə birlikdə Ermənistandan deportasiya olunub. Əvvəlcə Gürcüstanda, sonra Qaradağ rayonunun Lökbatan qəsəbəsində məskunlaşıb. 1991-ci ildə burada 106 saylı məktəbi bitirib. Milli azadlıq hərəkatının fəal üzvlərindən biri olub. 1992-ci il iyunun 27-də Ağdərənin Kiçik Qarabəy kəndi uğrunda döyüşlərdə düşmən mühasirəsinə düşüb və qəhrəmancasına həlak olub. Bakı şəhərinin Şəhidlər Xiyabanında dəfn edilib. Azərbaycan Prezidentinin 6 noyabr 1992-ci il tarixli fərmanı ilə Səxavət Məhərrəmov ölümündən sonra "Azərbaycanın Milli Qəhrəmanı" adına layiq görülüb.

 

 

ƏHMƏD MEHBALIYEV

(1968-1993)

 

Qarabağ müharibəsi şəhidi Əhməd Suliddin oğlu Mehbalıyevin anım günüdür. O, 1968-ci il sentyabrın 1-də Naxçıvan Muxtar Respublikası Şərur rayonunun Qıvraq kəndində anadan olub. Cəmşid Naxçıvanski adına Hərbi Liseydə təhsilini bitirdikdən sonra ali hərbi təhsil almaq üçün Kazana yollanıb. Buradakı Kazan Ali Tank Məktəbini 1989-cu ildə tank komandiri kimi leytenant rütbəsi ilə bitirib. Daha sonra Kiyevdə və Moskvada SSRİ-nin tank qoşunları diviziyalarında xidmət edib. Qarabağ müharibəsi başlayandan sonra Azərbaycana geri dönüb. Şuşa, Laçın, Qubadlı, Kəlbəcər və Tərtər bölgələrində gedən ağır döyüşlərdə iştirak edib. Taqım komandiri Əhməd Mehbalıyev 25 iyun 1993-cü ildə Ağdamın Qızıl Kəngərli kəndi uğrunda döyüşlərdə şəhid olub. Azərbaycan Prezidentinin 25 iyun 1994-cü il tarixli fərmanı ilə “Azərbaycan Bayrağı” ordeninə layiq görülüb.

Müəllif | Apa.Tv

Apa.tv

Kodu kopyalayın